hoepertingeRS

Ingesproken door Jozef Maes

Opname te Hoepertingen op 6 dec 2000

iN SCHRIFT

DE zwatten hEir

Lang gelèie, in de Middelèiwe, stond heì in Hoepertinge e këstèil. ¹Da hèiden ‘t Këstèil van Emmere. ‘t Was rond 1350 da dóë hèil vrùmde dinge gebeurde rond da vervalle këstèil. Op vùil naâchte ²jonde de minse geplog dur ³gekeëk en ⁴vùil lëweït. Dóë ⁵djos niemand ne mie bôöte köume
Vanáchter hoek of kânt zoge se da dóë ‘n gröute zöug ⁶bè hur kurre alles in de wèie en ⁷de heüf verniellde. Deì bèste mòkde kuíle, zoe diep dá dje ter gemäkkelïjk êin kos verdrêinke as ze vol wetter stônte. Bovenop da wetter dreejf ‘n rosselechtige ⁸kôs. Da was van de stront van da verke. Ooch vùil minse mèinde gezien te hùbbe da deì zöug ìjzere tette haö

‘t Was ooch algemèin gewèite da in diën umtrèk van Emmere ‘s naâchs inne zwatten hèir ronddwaolde. Dië zwatten hèir zöu bè e geheìm zitte dat ëhr òn iemand zöu moete koenne vertelle. ⁹Alleman zoët stìjf va skrik en mìjde ‘s oves deì buurt

Op ‘nen ovend koom dóë inne bõewrezöun truq van-e wêinterkermis. Heë haö ‘n hèil dèil snapskes zòlliger gemòk en ¹⁰hao gin goesting vur zoe ne lángen umweg te maoke. Heë daâch : "Ich gòn mer rap lengs Emmere, ‘t zöu toch toevallig zèn da den hèir ooch dies naâch wir op ronden is...

Ongeviër on Sint-Jobkepel, deì kot bi Emmere lit, hurde heë het allerskónste meziêjk

Hee blèif stìjf va skrik stun want heë zoog höug bove de kepel minse zwèive. Hee kos z’n öuge nie geluive en wrèif ter ins goed êin. Mah dei gestaltes dei blèive mer zwèive en jonde gelèid dur ne zwatten hèir… Dé Zwatten Hèir! ¹¹Weì den das gedun was, kome doo twie joeng ¹²mamzellekes en haolden ozze boewrezöun terbìjë om mië te ¹³daaste

De Zwatten Hèir vùrmde de koppels en de boewrezöun, dië krèig zelfs ¹⁴ ‘t skónste mètske aongewèize. De meziêk begos ¹⁵opnöuw te spèile. De jóng vuulde z’n ¹⁶vüt van de grônd köume en heë zwefde dur de löuch. Hee belefde ‘t skónste mëment vá ze leëve. De meziêk was goddelijk en ‘t was zaolïg in ¹⁷de erm van zoe ‘n hiêmels sköun mètske. Noo ‘n tijdje klöunk de meziêk alted mer stillekëser en stillekëser en se ¹⁸stopde op 't lêiste. Toen koom doo ‘n mëdam, hèilegaans in 't wit geklèid. ‘t Was de vröuw van de Zwatten Hèir en se zèi ûivergelukkïg te zen da se eìndelïjk ‘ne mins aontrof tussen hur daasters. Doëvuir góf ze ‘n ronde van hurre fìjnsten draank. ¹⁹Drei meëd komme terbìjë. Iën druug gouwe bèikers versierd bè diamante. De twidde hao ‘n gröute krôôk en de derde glaöze

Toen nom de Zwatten Hèir ‘t wood en ooch heë zèi hèil ²⁰content te zen da doö eíndelïjk e minsekêind in hun gezelskap was geköume. Heë stók z’ne bèiker höug in de löuch en ozze boewrezöun dië ²¹duj hetzelfde. Dië stók z’ne bèiker ooch höug in-e löuch en hee zèi ôöt gewèinte : «Op God’s genade.»

Op da mëment stond dië jóng hèilemaol allèin vur de këpel, bè de beiker nog in de haand. ²¹ ‘Hèilegaans ôöt löud geslaoge’, luup dië jóng ²²tos en hè verstopde de bèiker

Z’n maa hao niks gezin. Toch, ²³weì mojjers da altìjd zen, zè zoog ooch da doo iets skilde bè hurre jóng. Ze zèi allèin : « ’t Is giêstere laot jônne, menneke! »

²⁴Èintige weëke ²⁵goenke vurbìjë totda doo op ‘ne vrìjdaog ‘n sjieke medam òn 't hôös van de jóng aonklopde. De maa duj ope. “Goeiendaog,“ zèi de vröuw, “iech ben handelaarster in good en diamante, hèt djeë mich niks te köup ?” “Nèèn,” lùdde ‘t antwoöd, “veë zen mer erm boewreminse, zoe ‘n rìjke zaoke hemme veë nie.” Toen vroeg de vröuw vur hurren  zöun ins te-bìj te roepe. De maa vond da wel ²⁶vrùmp, mer dui toch wa hur was gevrog. ¹¹Weì de zöun koom, die herkaand drek de moch van deì biezondere naach. Z'n ²⁷bèin trilde en 'hi dui ‘t ²⁸bekans in z'n broek va skrik. « Menèir! » zèi se streng, « iech köum dië bèiker truqhaole, dië dje mie tos genöumen hèt ! » Rapper as de bliksem haolde die jong de bèiker en goof ‘m truq. De vröuw bekìjfde hum vur ze gedrag noö diën daas en se zèi da ter vá gelùk möuchde spreëke dat ër doo zoe goed was vanaof geköume. ²⁹Se dreìde hur um en se verdwèiën

¹dat heette           ²werden                ³geschreeuw
⁴veel lawaai           ⁵durfde                 ⁶met haar biggen
⁷[de heüf] de tuinen            ⁸korst      ⁹iedereen

Uit: “De Geschiedenis van Hoepertingen en Oude Spookverhalen – G. Van Meer”