GUÌVE

Spreker

Jean Defooz (°1915)
Jean va Truuke

Opnamedatum
9 aug 2000

iN SCHRIFT

GETRAPPEERD

Do wes ‘ne kwezel, had twee pappegois krege en ze wis nie wèè het menneke wes van-e twie, eh. Doen zèi dië man wa hur da gegeëven haö, dje moet 'r mer ins op lètte… dee wa va-bove zitte git, da’s het menneken, eh.
En op ‘nen oovëd, ze wes hurre patternôster òn ’t ¹beeje, wes ’t zoe ²wèëd en ³djus git de deurbel. Djuu zèt se, dat dó jus iemëd moet ⁴êinkome, zjus op de goeie momênt… Waach, ich zal m’ne patternôster rond z’ne nak ⁵drèë, dan kèn ich ‘m sêws. Ze git ope dôn, kuum dóë zoe ne bruìne paöter êin, ⁶bè zoe ’n witte kood rond ‘m, eh… en ne patternôster ter aon hánge tot aon-e grônd. En de pappegoi kreeg diën in de gaöte...
“Hej kammeraöd,” zèt ër tege de paöter, “hùbbe ze oech oek ⁷getrappeerd?”

¹bidden        ²ver           ³juist (op dat moment)
⁴binnen komen              ⁵draaien, omdoen
⁶met                             ⁷betrapt